Gå til indhold
Ujaasineq
Kalaallit Nunaanni Parnaarussiveqarfiit > Kalaallit Nunaanni Parnaarussiveqarfiit pillugit > Tusagassiuutit > Inissinneqarsimasumik apersuineq

Inissinneqarsimasumik apersuineq

Pinerluttulerinermi inatsimmi § 220 malillugu, eqqartuussat, piffissamik pineqaatissiffiusumik atuinissamik eqqartuunneqartut oqaaseqarsinnaatitaapput, tassungalu atatillugu tusagassiuutinit assilitissinnaallutik.  Pinerluttulerinermi inatsimmi § 220, imm. 2 malillugu, parnaarussiviup isumannaatsuunissaa, inatsimmik unioqqutitsinermi eqqunngitsuliorfigineqartup illersorneqarnissaalu eqqarsaatigalugit, imaluunniit allakkut inatsisitigut naapertuilluartoqarneranik erseqqissumik innarliisoqarnera akiorniarlugu, pisinnaatitaaneq taanna Kalaallit Nunaanni Parnaarussiveqarfinnit killilerneqarsinnaavoq.

Tigummigallagaaneq pillugu nalunaarummi nr. 1176-imi, 7. december 2009-meersumi (Tigummigallagaaneq pillugu nalunaarummi) § 58 malillugu, tigummigallarneqartut tusagassiuutinut oqaaseqarsinnaatitaapput tassungalu atatillugu assilineqarsinnaallutik.

Tigummigallagaaneq pillugu nalunaarummi § 58 malillugu, tigummigallagaanerup siunertaa eqqarsaatigalugu, oqaaseqaateqarnissamut akuersissummik tunniussisoqarnissaa aamma tassunga atatillugu assiliisoqarnissaa, Kalaallit Nunaanni Politiit akerlilersinnaavaat.  Politiit akerliliinngippata, parnaarussiviup isumannaatsuunissaa imaluunniit inatsisitigut naapertuilluartoqarneranik erseqqissumik innarliineq allakkut akiorniarlugu, Kalaallit Nunaanni Parnaarussiveqarfiit akuersissut killilersinnaavaat.

Suliani ataasiakkaani tamani, inissinneqarsimasut tusagassiuutinit taavigineqarnissaat kissaatigineqartillugu, tigummigallagaasunut aamma eqqartuussanut attaveqarnissamut akuersissut pillugu qinnuteqarnissaq pisariaqarpoq.  Kalaallit Nunaanni Parnaarussiveqarfiit taamaalilluni malittarisassat qulaani taaneqartut innersuussutigalugit, suliani ataasiakkani taakkunani pissutsit assiginngitsut tunuliaqutaralugit, inatsisilerinermut tunngasumik piviusumik nalilersuisarput.  Tigummigallagaaneq pillugu nalunaarummi § 60 malillugu, tigummigallagaasut politiit isertitsiviini inissinneqartut pillugit suliani Kalaallit Nunaanni Politiit aalajangiinernik aalajangiisarput.

Qinnuteqaat uunga nassiunneqassaaq:

Inissinneqarsimasumut tassunga atassuteqareersimaguit, parnaarussivimmut, inissinneqarsimasup inissinneqarfianut, presse@dkf.dk cc-rlugu noqqaassutit nassiutissavat.  Inissinneqarsimasoq sumi inissinneqarsimanersoq nalugukku, Kalaallit Nunaanni Parnaarussiveqarfinnut Qullersaqarfimmut presse@dkf.dk cc-rlugu (knp@knp.gl-imut) noqqaassutit nassiutissavat.

Apersuiniarneq pillugu qinnuteqaat tulliuttunik imaqassaaq:

  • Apersuinermi siunertaq, aamma sammisat suut apersuinermi imaritinneqassanersut pillugit allaaserinninneq.  Tamanna pingaaruteqarpoq, tassami pissutsit, inissinneqarsimasup oqaaseqaateqarfigissallugit akuersissummik nalunaaruteqarfigineqarsinnaaffiginngisai pisinnaapput, assersuutigalugu inissinneqarsimasoq pillugu suliaq/inissinneqarsimasup pinerluttuliorsimanera.
  • Apersuinerup qanoq ittuunissaanut kissaatit pillugit paasissutissat.  Assersuutigalugu aviisimut ilanngutassiaanersoq, podcastiunersoq imaluunniit TV-kkut aallakaatitassiaanersoq
  • Taakkua saniatigut qinnuteqaat illit pillutit attaveqarfissanik piviusunik imaqassaaq: oqarasuaatit, mailit immaqalu najukkat.

Akuersissutip nalunaarutigineqarnerata kingorna

Inissinneqarsimasup apersorneqarnissaanik akuersissummik nalunaarfigineqaruit, taakku pigeriinngikkukkit, sullissivik, inissinneqartup inissinneqarfia, oqarasuaatikkut oqaluunnissamut akuersissut pilersinniarlugu imaluunniit inissinneqarsimasup pulaarnissaanut akuersissut pissarsiariniarlugu, attaveqarfigissavat.  Taamaaliorsinnaanerit akuerineqartoq nalunaarfigineqaruit, inissinneqarsimasoq attavigisinnaavat apersuinerlu naammassillugu.

Akuersissut nalunaarutigineqartoq illit nakkutigisassannik piumasaqaatitaqarsinnaammat maluginiassavat.

Apersuinissamut piumasaqaatit eqqortinneqarsimanersut qulakkeerniarlugu, atortussat, illit saqqummersissallugit kissaatigisavit, Kalaallit Nunaanni Parnaarussiveqarfinnit apersuereernerup kingorna misissorneqarnissaat/tusarnaarneqarnissaat, piumasaqaatit ilagisinnaavaat.  Tamanna nipinut immiussanut, assinut aamma allaaserisanut atuuppoq.  Aallaqqaataani imarisanut oqaaseqaateqassappata, atortussat aaqqissuussat nutaamik misissorneqarnissaannut nassiunneqarnissaat, Kalaallit Nunaanni Parnaarussiveqarfiit piumasaqaatigisinnaavaa.  Taamaammat apersuinissamut qinnuteqaatip suliarineqarneranut piffissap atorneqartussap saniatigut aamma tulliusumik atortussat misissorneqarnissaannut piffissap atorneqarnissaa naatsorsuutigissavat.

Piumasaqaatit atuuttut eqqortinneqarsimanersut misissorniarlugit, tamanna taamaallaat aallartinneqassammat, Kalaallit Nunaanni Parnaarussiveqarfiit erseqqissassavaat.  Tusagassiuut suli nammineq aaqqissuisinnaatitaavoq.  Inissinneqarsimasoq inissinneqarsimasut allat sulisullu pillugit oqaaseqaateqarsinnaanngimmat, aamma inissinneqarsimasut allat kiisalu sulisut Kalaallit Nunaanni Parnaarussiveqarfimmit akuersissummik peqarani filmiliorneqarsinnaanngimmata/apersorneqarsinnaanngimmata, illit aamma eqqumaffigissavat.

Inissinneqarsimasut allat pillugit paasissutissaasinnaasut, pulaarnerpit nalaani ilisimalikkatit/ilisimalikkasi, atorneqarsinnaanngimmata, naggataagut eqqumaffigissavat.