Inummut paasissutissat

Kalaallit Nunaanni Paarnaarussiviit suliassaannik suliarinninnermut atatillugu Kalaallit Nunaanni Paarnaarussiviit inuit ataasiakkaat pillugit paasissutissanik (inummut paasissutissat) suliaqartarput.

Pinerluttulerinermut inatsisitigut pineqaatissiissutit naammassitinnissaat Kalaallit Nunaanni Paarnaarussiviit suliassaraat, taamaalillutillu pinerluttuliortarnernut killileeqataasarlutik. Kalaallit Nunaanni Paarnaarussiviit suliassaannik erseqqinnerusumik maleruagassiinermi ilaatigut Kalaallit Nunaannut pinerluttulerinermut inatsit malinneqarpoq.

Danmarkimi Paarnaarussiviit inummut paasissutissanik suliarinninnermut, ilaatigut Kalaallit Nunaanni Paarnaarussivinni ingerlanneqartumut, paasissutissanut nalunaarsukkanut akisussaasuupput. Inummut paasissutissanik ilinnut tunngasunik suliarinninnermut ilaatillugu Danmarkimi Paarnaarussiviit attaveqarfigerusukkukkit, attaveqarfigisinnaavat:

Styrelsen for Danmarks Fængsler
Strandgade 100
1401 København K
Att. Afdeling for Jura og Internationale Forhold

E-mail: afd_jif@dkf.dk

Kalaallit Nunaanni Paarnaarussiviit qaqugukkut illit pillugit paasissutissanik suliaqaqqusaappat?

Kalaallit Nunaanni Paarnaarussiviit inatsisinik atuutsitsillutik oqartussat inunnut paasissutissanik suliarinnittarnerat pillugu inatsisip Kalaallit Nunaannut atuutilersinneqarnera pillugu peqqussummut nr. 898, 26. juni 2023-meersumut), takuuk bekendtgørelse nr. 711 af 28. august 2026, naapertuuttumik iliuutsinik pinerluttulerinermut inatsisitigut akisussaatitsinermik malitseqarsinnaasunik pitsaaliuinissamut, paasiniaanissamut, ersersitsinissamut imaluunniit eqqartuussivilersuussinissamut tamanna pisariaqarpat, illit pillutit paasissutissanik inatsisit malillugit suliarinnissinnaapput. Tamatuma saniatigut pinerluttulerinermut inatsisitigut pineqaatissiissutit naammassitinnissaannut tamanna pisariaqarpat, ilanngullugit tamat isumannaatsuunerannik illersuinissamut imaluunniit qunusaarinernik pitsaaliuinissamut, Kalaallit Nunaanni Paarnaarussiviit illit pillugit paasissutissat suliarisinnaavaat.

Siunertap matuma siuliani allassimasup isumagineqarneranut ilaatillugu illit eqqartuussivimmi pineqaatissinneqarsimasoq, tigummigallarneqartoq imaluunniit unnerluutigineqartoq pillutit Kalaallit Nunaanni Paarnaarussiviit inummut paasissutissat suliarisarpaat. Kalaallit Nunaanni Paarnaarussiviit tassunga atatillugu illit qanigisaasoq, pulaartoq imaluunniit eqqartuussissuserisoq pillutit paasissutissat aamma suliarisarpai.

Kalaallit Nunaanni Paarnaarussiviit tamatuma saniatigut inunnik paasissutissanik suliarinnittarneq pillugu inatsisip Kalaallit Nunaanni atuutilersinneqarnera pillugu peqqussummi nr. 1238, 14. oktober 2016-imeersumi (Kalaallit Nunaannut inummut paasissutissat pillugit inatsit) maleruagassanut naapertuuttumik illit pillutit paasissutissat suliarisinnaavaat, assersuutigalugu tamanna inatsisitigut pisussaaffiup Kalaallit Nunaanni Paarnaarussiviit malitassaata naammassinissaanut pisariaqarpat, imaluunniit inuiaqatigiinni soqutigisani suliassap suliarinissaannut pisariaqarpat.

Kalaallit Nunaannut inummut paasissutissat pillugit inatsimmi maleruagassat malillugit illit allagaatinik takunninnissamik qinnuteqaammik tunniussiguit imaluunniit allanut atatillugu Kalaallit Nunaanni Paarnaarussivinnik ikiorneqarnissarnik qinnuteqaruit, Kalaallit Nunaanni Paarnaarussiviit ilaatigut illit pillutit paasissutissanik suliarinnissinnaapput.

Inatsisinik atuutsitsinermut inatsimmi aamma Kalaallit Nunaannut inummut paasissutissat pillugit inatsimmi ataatsimoorutaavoq, Kalaallit Nunaanni Paarnaarussiviit paasissutissanik immikkut ittunik (inummut paasissutissat mianernartut) taamaallaat suliarinneqqusaanerat – tassa imaappoq ammip qalipaataa imaluunniit inuiannit aalajangersimasuneersuuneq, politikkikkut, upperisakkut imaluunniit isumaliortaatsikkut upperinninneq, sulisartut peqatigiiffiinut atasuunermut tunngasut, pillugit paasissutissat, inuup sananeqaataasigut kingornuttakkatigut paasissutissat, inuup paatsuugassaanngitsumik kinaassusersinissaa siunertaralugu inuup ilisarnaataannut paasissutissat nalunaarsukkat, peqqissutsimut paasissutissat imaluunniit inuup kinguaassiutitigut atugai imaluunniit kinguaassiutitigut sammivia pillugit paasissutissat – tunngavissarititaasut immikkut ittut naammassineqarsimappata.

Illit pillutit paasissutissanik tigusisut

Kalaallit Nunaanni Paarnaarussiviit Danmarkimi Paarnaarussivinnut Aqutsisoqarfimmut, Fængselskreds Øst-imut aamma Fængselskreds Vest-imut, suliassanik isumaginninnissamut tamanna pisariaqartillugu, inummut paasissutissat avitseqatigiissutigisarpai.

Kalaallit Nunaanni Paarnaarussiviit inummut paasissutissat oqartussanut allanut ingerlateqqittarpaat, assersuutigalugu politiinut, unnerluussinermut oqartussamut, Kalaallit Nunaanni Isumaginninnermut Aqutsisoqarfimmut kommuninullu kiisalu namminersorlutik ingerlatsisunut. Suliassanik isumaginninnissamut pisariaqartillugu imaluunniit Kalaallit Nunaanni Paarnaarussiviit paasissutissat ingerlateqqissagaat inatsisini allassimatillugu, ingerlatitseqqiineq pisarpoq.

Pisuni aalajangersimasuni Kalaallit Nunaanni Paarnaarussiviit inummut paasissutissat nunanut allanut EU-p avataaniittunut aamma nunani tamalaani kattuffinnut ingerlateqqittarpaat. Pingaartumik nunani allani naalagaaffimmi innuttaassuseqartut imaluunniit innuttaasut Kalaallit Nunaanni najugaqanngitsut pillugit inummut paasissutissanik Kalaallit Nunaanni Paarnaarussiviit suliarinnitsillugit, tamanna atuuppoq. Tamanna assersuutigalugu nunamit anisitsinermut ilaatillugu, misiligummik iperangaanermi imaluunniit nakkutilliinermut atatillugu nunani allani oqartussanut pisinnaavoq.

Paasissutissanik ilinnut tunngasunik uninngasuutiginninneq

Paasissutissanik suliarinninnerup siunertaa eqqarsaatigalugu tamanna pisariaqartoq Kalaallit Nunaanni Paarnaarussiviit naliliippata, imalluunniit Kalaallit Nunaanni Paarnaarussiviit paasissutissat uninngasuutiginissaannut pisussaaffeqarpata, Kalaallit Nunaanni Paarnaarussiviit inummut paasissutissat ilinnut tunngasut uninngasuutigisussaavaat.

Pisinnaatitaaffitit

Inatsisinik atuutsitsinermut inatsimmi aamma Kalaallit Nunaannut inummut paasissutissat pillugit inatsimmi arlalinnik pisinnaatitaaffeqartinneqarputit. Illit pisinnaatitaaffitit inatsisinik atuutsitsinermut inatsimmi kapitali 4-7-imi aamma 22-mi aammalu inummut paasissutissanut inatsimmi kapitali 8-10-mi allassimapput.

Paasissutissanik Kalaallit Nunaanni Paarnaarussiviit suliarisaannik sorlernik takunninnissaq

Paasissutissanik Kalaallit Nunaanni Paarnaarussiviit illit pillutit suliarisaanni aammalu paasissutissanik allanik arlalinnik takunninnissamik qinnuteqarsinnaavutit. Tassunga atatillugu aallaaviatigut Kalaallit Nunaanni Paarnaarussiviit illit pillutit paasissutissanik suliarinnissimanersut uppernarsinissaanut pisinnaatitaaffeqarputit.

Naqqiissuteqarnissamut pisinnaatitaaneq (iluarsiineq)

Illit pillutit paasissutissat eqqunngitsut iluarsitinnissaannut pisinnaatitaaffeqarputit.

Piiaanissamut pisinnaatitaaneq

Pisuni immikkorluinnaq ittuni, Kalaallit Nunaanni Paarnaarussiviit nalinginnaasumik ataatsimut isigalugu piiaanissaannut piffissaq tikitsinnagu, illit pillutit paasissutissat piiartinnissaannut pisinnaatitaaffeqarputit.

Suliarinninnerup killilernissaanut/mattunnissaanut pisinnaatitaaneq

Pisuni aalajangersimasuni inummut paasissutissat ilinnut tunngasut killilertinnissaannut/mattutsinnissaannut pisinnaatitaaffeqarputit.

Akerliliissuteqarneq

Pisuni aalajangersimasuni Kalaallit Nunaannut inummut paasissutissat pillugit inatsit malillugu inummut paasissutissanik ilinnut tunngasunik inatsisit malillugit Kalaallit Nunaanni Paarnaarussiviit suliarisaraluinut akerliliissuteqarnissamut pisinnaatitaaffeqarputit.

Attaveqarfissamut paasissutissat

Pisinnaatitaaffivit taakkua atornissaat kissaatigigukku, attaveqarfigisinnaavat:

Kalaallit Nunaanni Parnaarussiveqarfinnut Qullersaqarfik
Qullilerfik 2, 5. sal, Postboks 369
3900 Nuuk

E-mail: knp@knp.gl

E-mail-imik nalinginnaasumik nassiussineq paasiuminaallisakkatut pissanngilaq. Taamaattumik paasissutissat illersorneqartariaqaraluartut nassiunniarukkit, assersuutigalugu pinerluttulerinermut inatsisinut tunngasut pillugit paasissutissat, aammalu qarasaasiatigoortumik isumannaatsumik allakkanik nassiussinissamut tigusinissamullu periarfissaqarsimanngikkuit, nalinginnaasumik allakkatigut nassiussineq atussagit, Kalaallit Nunaanni Paarnaarussiviit qinnuigaatsit.

Naammagittaalliorniaruit

Kalaallit Nunaanni Paarnaarussiviit inummut paasissutissanik ilinnut tunngasunik passusseriaasia naammagittaalliuutiginiarukku Datatilsynimut saaffiginnissaatit. Aamma illit pillugit inummut paasissutissanik suliarinninneq inatsisit malillugit pinersoq misissoqqullugu Datatilsynet qinnuigisinnaavat.

Datatilsynet naalagaaffimmi oqartussaavoq arlaannaannulluunniit attuumassuteqanngitsoq, ilaatigut inatsisinik atuutsitsinermut inatsimmik aamma Kalaallit Nunaannut inummut paasissutissat pillugit inatsimmik nakkutilliisuusoq. Datatilsynet aamma inummut paasissutissanik oqartussat suliarinninnerannut naammagittaalliuutit suliarisarpai. Aamma Kalaallit Nunaanni Paarnaarussiviit inatsisinik atuutsitsinermut inatsimmi kapitali 4-6 malillugit pisinnaatitaaffernik atuutsitsinnginnissaq, kinguartitsinissaq, killiliinissaq imaluunniit atuutsitsiumannginnissaq pillugu aalajangiisimappata, Datatilsynet pisinnaatitaaffernik atuisissinnaavat.

Datatilsynet imatut attaveqarfigineqarsinnaavoq:

Datatilsynet
Carl Jacobsens Vej 35
2500 Valby

E-mail: dt@datatilsynet.dk
Oqarasuaat: +45 33 19 32 00

Naammagittaalliornissamut periarfissat pillugit Datatilsynip nittartagaani annertunerusut atuarsinnaavatit.

Paasissutissanik nalunaarsukkanik illersuinermut siunnersortimut attaveqarfissanut paasissutissat

Kalaallit Nunaanni Paarnaarussiviit inummut paasissutissanik ilinnut tunngasunik suliarinninnerat pillugu apeqqutissaqaruit, Danmarkimi Paarnaarussiviit paasissutissanik nalunaarsukkanik illersuinermut siunnersortaannut attaveqarnissamut tikilluaqusaajuaannarputit.

Danmarkimi Paarnaarussiviit paasissutissanik nalunaarsukkanik illersuinermut siunnersortaannut imatut attaveqarfigisinnaavat:

Styrelsen for Danmarks Fængsler
Strandgade 100
1401 København K

Att. Databeskyttelsesrådgiveren

E-mail: dpo@dkf.dk